混血名模Rosemary昨日大吐苦水，指母親Julie仍然掌管其財政，她指縱然母親現在已不是其經理人，但仍想處處控制她，Rosemary強調只是希望獨立理財，並不想傷母女情。但其母昨日得知此事後勃然大怒，更嘲弄女兒，指她如果開口要求貼男人，她便會開水喉。
陳嘉容、混血名模貝安琪、Rosemary及邵美琪等昨日往尖沙嘴出席LuLuCheung新店開幕活動，Rosemary一見記者即大吐苦水，事緣她日前往銀行櫃員機提款，但戶口卻沒有錢，令她十分尷尬。她說：「雖然我𠵱家簽咗agency一年，媽咪已經唔係我經理人，但係啲收入都係入落我同媽咪嘅聯名戶口，佢仲係要控制我，我有就呢件事問過佢，但係佢都冇反應。」
希望取消現有戶口
Rosemary續說：「我已經25歲，唔係14歲啦，我知道喺呢10年我好幸運、好開心，但係我已經長大，唔再係14歲啦，我都有自己嘅主見、事業，唔想再俾媽咪控制住。我有同啲朋友傾開，發現媽咪多年嚟教我嘅理財概念都係錯嘅，就算𠵱家我簽新agency，都控制唔到自己收入，咁同以前有乜分別呢？我都希望可以cut咗呢個戶口，我唔係想hurt媽咪，我自己都好sad。」
記者指Rosemary母親這樣做可能是怕她將來會忘記她，她說：「我點會唔記得媽咪呢？其實我好愛佢，或者佢覺得有錢就有安全感啦，我都工作咗10年，好想學吓自己理財，我都好想可以好似Kathy（周汶錡）同Eunis（陳嘉容）咁獨立。」
母火滾擬發律師信
記者昨日致電Julie，當她知道女兒向傳媒吐苦水指財政被凍結時，即火起說：「乜嘢話？佢冇腦㗎？同傳媒講呢啲嘢，𠵱家想搵傳媒大迫供呀？如果佢大方話想將啲錢用嚟貼男人，我咪畀佢囉，聽日（即今日）見報後我實發律師信同佢算賬，我最嬲佢就係一識咗男朋友，就一聲不響飛甩我，我係佢經理人嚟㗎嘛。」記者指Rosemary說曾與她談過此事，是她沒反應，感到投訴無門才向記者說出此事，Julie說：「我就投訴無門啦，我栽培咗佢十幾年，佢咁就走咗！」
採訪：JessicaNgan
攝影：DickyChan
