散戶炒股，心中都有一個目標價，但當隻股到咗目標價，佢哋又會猶豫，「放好定唔放好，可能仲有得升噃！」網友雪山飛貓就話，喺呢個決定沽貨嘅過程中，往往可以領悟到精人同蠢人嘅分別。
第一日 絕頂聰明
喺第一日就沽貨嘅散戶，係一個絕頂聰明嘅人，對自己有強烈自信，決斷力強。不過，由於咁自信，所以賭仔性格好重，當佢嘅判斷係啱嘅時候，當然贏好多兼有成功感，相反，就會一敗塗地。當然，由於絕頂聰明，所以成功嘅機會會大啲！
第二日 決斷力強
喺第二日沽貨嘅散戶，亦係一個聰明人，對自己有自信，決斷力強，但就比較謹慎。基本上佢唔係賭運氣，而係靠判斷。所以，佢唔會喺短時間取得好大嘅成功，但長遠嚟講，佢嘅成功機會好大。
第三日 紀律嚴明
第三日先出貨嘅人，唔算聰明，當然，亦都唔可以話佢蠢。佢係一個紀律嚴明嘅人，喺做決定時唔會有絲毫個人感情，事實證明一切，為人亦相當謹慎。所以當佢明白事情嘅結果，即使有好大損失，亦會坦然接受現實，止蝕離場。因為咁，佢唔會喺短時間成功，但亦唔會一敗塗地。當然，長遠嚟講，佢嘅成功機會都幾大。
第四日 左搖右擺
等到第四日先賣咗啲股票，呢位仁兄冇自信、冇決斷力，兼且貪婪。佢嘅思想左搖右擺，受周圍環境影響。基本上炒股成功可能性唔高，喺股市入面，呢類人佔最多數。
第五日 智商極低
第五日先揸定主意沽貨，基本上你會見到一個新嘅儍仔出現。呢個儍仔智商真係低到好難用說話形容，佢每日做嘅嘢係──低賣高買。普通人見到佢咁樣炒股，只會講：「要好似佢咁準、低賣高買，喺短短嘅時間蝕咁多，真係一件非常之難嘅事！」
報料站
歡迎提供網上財經趣聞，資料一經採用，酬100元。請附姓名、電話及電郵地址，交[email protected]