今日請王貽興上嚟，唔係叫佢講尼斯湖水怪，亦唔係教大家個「正」字點寫；而係叫佢講車經，點知佢竟然九唔搭八同我哋講《變形金剛》！小記即刻望吓架車，明明係VolvoC70，點睇都唔似柯柏文或者麥加登㗎，唔通佢想同我哋玩……謎？「唔係！其實係『迷』先啱，因為我係《變形金剛》Fans；我揀電動開篷跑車，因為佢開篷變形時真係好鬼似《變形金剛》，我一直都好希望有架車好似變形金剛咁隨時變身，同我一齊闖蕩江湖，呢個就係我鍾意佢嘅原因！」
文：許一楓 攝影：陳偉強
童心未泯
呢期跑出嘅王貽興，以中文大學中文系畢業，再加小說創作人身份，初上公仔箱，電視台仲以《最緊要正字》BuildUp佢嘅才子形象，比起隔籬兩位女主持，實在有深度得多。貽興拍住秋官，晚晚擔起全城熱話嘅《謎》，見佢說話談吐得體，滋油淡定，加埋佢嘅學歷同外形，要做新晉小生，又點會唔入流呢？
初見面睇佢黑黑實實，以為佢一定Man到不得了，點知一開口就成個大細路咁，「係㗎！我覺得做人要有童心，童心唔係扮可愛喎，而係用小朋友嘅角度去睇一件事，事事要有求真嘅心，尤其係我哋做藝術創作呢一行！」
變形金剛大變
工作要有童心，揀車都話要有童心：「由細到大，我都好鍾意變形金剛，見佢可以由車變做機械人，我覺得好吸引同好有型！」點解無端端同我哋講玩具經？貽興，我哋做緊車版訪問喎：「嘻嘻！因為我鍾意變形金剛，所以揀車都要揀番架開篷，睇住佢由硬頂變成開篷車，感覺好正，好似變形金剛變緊身咁！」
貽興一見到C70，第一時間就話要上車嚟個大變身，負責人先嚟個開篷示範，貽興即刻話：「我一陣都要喪㩒個開篷！哈哈！」邊開硬篷頂，小記偷眼望見貽興㩒掣時口擘擘，唔通真係興奮到靜雞雞唱《Transformers》？「我喺度叫緊口號，就係『變形金剛，變身！』記得細個嗰時變形金剛卡通片都會咁講㗎！」
對不同生活着迷
貽興從小已經鍾意《變形金剛》：「可能受漫畫同卡通影響，我覺得佢最吸引係可以隨時變形，你諗吓一個人如果成世只有一張面孔真係太悶喇，如果變身後可以有唔同形態，好型㗎！」雖然𠵱家嘅貽興已經牛高馬大，工作又忙，不過佢依然鍾意玩變形金剛：「我會匿喺屋企玩，尤其玩麥加登，扭到成晚唔瞓都得！」
人大了，貽興開始領略到小時候點解咁鍾意變形金剛：「可能反映我對唔同生活嘅着迷啩，可以有時過機械人生活，有時又可以過做車嘅生活，生活多啲變化同體驗，對自己對寫作都有好大益處。」
揸車搵靈感
未過30歲嘅貽興，原來已經出過十幾本小說同散文，仲喺報章雜誌寫過唔少專欄，雖然揸車經驗唔算豐富，不過貽興覺得寫作同揸車有好多相同嘅地方：「兩者所需嘅天份都好緊要，而寫作嘅速度、節奏等等，亦同揸車好相似，前者嘅段落變化、行文速度同標點變化等，都影響文章連貫性；揸車亦一樣，你可以選擇急速、慢速去行，成程車揸得順唔順、係咪一氣呵成等，都好似寫文章咁。」
講車講到好似好多揸車經驗，原來貽興只係個新牌仔，「我考咗兩次先Pass咋，其實好唔抵，泊位OK，不過因為我唔喺試場度學，到考嗰日先至到考場，當日喺跑馬地藍塘道考，一考完泊位出車，發現個位原來好窄好斜，唔小心太接近欄杆，咁就衰咗！」
嚮往揸車生活
以為自己一世都同車絕緣嘅貽興，開頭學車都係因為工作方便，點知學吓學吓，考埋個牌，而且仲愛上埋車㖭，果然係一個車迷：「你可以完全操控到一樣嘢，就好似古時男人鍾意馴服猛獸一樣，好有滿足感！」見貽興仲甜絲絲咁話：「我好嚮往揸車嗰種生活模式，可以好瀟灑咁去邊都得，沙灘、山頂，甚至乎一啲只有車先入到嘅地方，都會變得無難度！」
學埋車，揸完呢架富豪C70，貽興突然略有感觸咁彈句：「終於明白點解啲人會願意花幾十萬買架車，原來有時車真係可以等於玩具一樣咁令人熱愛，如果將來搵到錢，我都想買番呢架變形金剛式嘅開篷車呀！」
踏上銀色旅途
闊別多年C70
30秒電摺硬頂
若然大家記性好的話，對C70這個名字應不陌生，因多年前Volvo舊代理曾將之引入，並以硬頂Coupe跑車版為主，可惜當年銷量平平，至今尚在街上行走的實在寥寥可數，後來他們更索性停止引入。
來到新代理，C70終有機會重臨香港，但今趟卻配用了開關只需約30秒的電摺硬頂，配合全新造型及以實用、豪華、跑味集一身的車廂編排，從而令其吸引力大增，難怪車迷會對之甚感興趣；引擎配搭卻暫時只得一台2.5公升直5Turbo型號，輸出尚算合格。
VolvoC70T5Profile
引擎：2,521c.c.直5DOHC配Turbo
馬力：220hp/5,000rpm
扭力：320Nm/4,800rpm
傳動：5前速Geartronic半自動波，前輪驅動
售價：$488,000
車輛提供：VolvoCarsHK（29273388）