同大家一樣，藍鑽石由細到大都受美國文化影響，唔講政治齋講睇戲，由當年《天煞地球反擊戰》到近年《蜘蛛俠》系列，咩大美國、霸權主義，真係窒息；一心諗住美國非足球（用腳踢嗰隻）強國，終於有個唞氣位，點知一個萬人迷碧咸，加埋足智彩開盤，美國嘢，想避都避唔甩。
4場金盃、2場美職，佔今日足智彩四份一場次，今日揀FC達拉斯贏洛杉磯銀河，純因銀河頹之餘冇埋當路雲，有排衰。整定碧咸下月將以救主身份出現，各位編輯諗定「萬人迷救銀河」呢類題都得囉。
主客和：FC達拉斯勝
心得：銀河比定位碧咸做救主
藍鑽石
愛意大利波、去意國度蜜月、囡囡與簡拿華路同日生日。