「落雨」近排有部講時下女性愛情生活嘅電影上畫，所以佢成日要出嚟做宣傳，見記者多過見屋企人，為免眼光光冇嘢講，佢惟有作料應酬啲記者啦，事關有次佢自爆喺戲中要同男主角「圓枱」拍情慾戲，事後大讚圓枱好有型，直情當係夢中情人，於是即刻返屋企上網翻查對方資料，先知人哋原來結咗婚，但其實圓枱結咗婚已係眾所周知嘅事，佢仲好大驚小怪咁當新聞講畀記者聽，真係估佢唔到。另外，有一日佢又自爆喺蘭桂坊遭外籍男士兜搭，邀佢一夜情，但查實當時佢係成班劇組喺蘭桂坊拍外景，成棚人喺現場，啲外籍人士根本冇機會埋佢身，又點約佢去玩一夜情呀，睇嚟落雨都當啲記者及讀者係儍嘅，成日作料要有人信至得㗎！
Textby關仁