商天娥跟《師奶兵團》中飾演的曹美娥，其實有點相似，大家性格都是直腸直肚，講說話有點硬繃繃，難怪首次跟她合作的葉童，一度誤以為娥姐是個說話頗寸的人，對此娥姐顯得有點愕然：「係咩？我份人好簡單、透明度好高，可能有時懶鬼馬、懶幽默，講嘅說話令人打個突、令人產生誤會啦！」
好演員情緒化
在娥姐心目中，葉童是個十分認真和成熟的演員，對於有指葉童演技浮誇，娥姐說：「我唔會理會人哋點，對我嚟講，總之大家守時，交足功課就得㗎啦！」那麼，葉童是否一如其外表般冷傲？娥姐說：「cool唔cool我唔評論，但私下慶功佢都好玩得，總之工作時工作，記得當年我同發哥（周潤發）做舞台劇嘅時候，佢都話過一個好演員一定情緒化，如果唔係佢都做唔到咁多情緒起伏嘅變化。」
至於劇中另一好姊妹鄧萃雯，娥姐直指雯女是緊張大師，她說：「雯女同劇入面個角色有一半相似，都係好緊張好認真，同佢合作，令我覺得佢係一個緊張大師，當然佢出發點都係為件事好啦！自己份人比較『滋油』，鍾意有新鮮感，好似排戲咁，唔鍾意排咁多次，因為排得多就會變得純熟咗，我比較鍾意突然間有啲火花彈出嚟，咁個個人做法唔同，好似我唔會用記事簿寫低自己嚟緊嘅工作，我只會用個腦去記，可能自己冇咁忙，冇咁多嘢去記啦！」
歎太少友情戲
娥姐認為，今次《師》劇描述三個師奶互訴心聲的戲份似乎較少，若能夠多一點三個女人的友情戲，效果將會更佳、更能引起共鳴，期望下次開拍續集時，監製能夠加多一點點吧！
