今季〈蘋果開倉〉尚餘兩次，我哋一眾名家都珍惜喺本版以波會友嘅機會，而本欄目已累積純利逾20%，個人相當珍惜呢條長勝路，今次重心推介金盃異軍加拿大W，希望延續頭條8連勝。
本欄開張兩個多月來，筆者喺度講過唔少自己嘅投注心得，希望大家不嫌小弟道理多多，因為要贏錢必要有精密嘅部署同本身忍功了得。
投注花款越多越弊
好似聽聞海外莊家投注花款越嚟越多，有一種好有趣叫做「夢幻對決」，即同日搵兩隊實力相若但唔同場合嘅球隊對決及估總入球。舉個例禮拜五早上美國同小保加兩大熱門分途出擊，海外莊家開出平手盤，估兩隊邊個入波多同埋開出4球/4球半嘅總入球，普羅大眾相信不少會捧美國入球多過小保加同總入球開大；結果卻相反，連總入球加埋都只係4球（小保加攻入3球，但美國爆大冷只入1球），買總入球上盤仲要輸半個。呢類賠率一博一都唔夠、卻要諗兩場波嘅風險極高，肯上釣者多屬水魚！
言歸正傳，今次主攻金盃，咪嫌偏鋒同開波時間要去到明早七點鐘，捉到場心水，就要集中注碼同埋夠忍耐力；若然早段傾囊博晒國際賽後狀況未明嘅日本波同西甲失手，跟住用追數心態買金盃，就會成為病態賭徒；注碼有限，記緊要精兵出擊。
莊家驚死更要捧
加拿大首仗出場，從精華片段看，可謂耳目一新，壓住美洲區實力分子哥斯達黎加嚟踢；趁實力未完全曝光，對住上場爆冷迫和海地嘅瓜德羅普仲有1.6倍W，馬會連「讓球主客和」都唔開，已將風險減至最低，必屬全日穩開但有分頭嘅單W。
博多場，買我之前推介過嘅愛隊維拉利爾，6連勝後有極強推動力爭足協盃席位，面對作客威力減半嘅畢爾包，睇吓維記呢個W可唔可以同我一齊延續呢條長勝路。
下次刊出日期為16/06（下周六），請繼續捧場。
蘋果波神
狂迷英國波，尊崇雲格；成與敗，視乎你是否找到真快樂！