韓國人氣5人組合東方神起近半年專注日本市場嘅發展，除咗喺下星期推出日文細碟《Lovin'you》外，又會喺東京武道館開個唱。神起咁威水，韓國政府當然要好好借用佢哋嘅人氣啦。噚日上午東方神起就喺首爾行政自治部出現，正式委任為政府電子化運動嘅宣傳大使，仲獲官員頒發委任狀㖭。當日唔止有大批記者到場，女fans亦不停為偶像拍照，場面非常混亂。