恒基兆業主席李兆基新抱徐子淇，佢個肚大到成個籮咁，雖然有消息指佢日內就會入醫院剖腹生產，不過子淇上月底又再蒲頭行街，當日佢喺模特兒好友陳君宜同保鑣護駕下，去咗金鐘西武行街買衫，作產前最後衝刺，其間佢仲買咗兩條花花裙，共值3,640元。當時子淇口口聲聲話自己8月先至係預產期。
未見買BB用品
如果照子淇所講，𠵱家到8月都只係剩番個零月左右，佢次次俾傳媒影到行街shopping，都好似淨係見佢買靚衫幫自己扮靚，從來冇俾記者影到佢去買嬰兒用品同BB衫，唔通佢真係唔心急？就嚟做爸爸嘅李家誠前晚喺電話中同馮仁昭講話：「有㗎，我哋都開始買緊。」咁買粉藍色多啲定粉紅色多啲？佢又話：「唔知，唔講咁多。」咁當然，模特兒出身嘅子淇平時都咁識打扮，睇怕佢將來都好識幫佢個金叵羅扮靚。