上周末偷得浮生半日閒，走咗去東京睇安田紀念大賽。舊年去捧場嘅香港客，買「牛精福星」與「勝利名駒」，因前者跑第一，後者跑第三，個個贏到笑。旅遊領隊下注一百萬日圓買「牛精福星」獨贏，收錢收到手軟。今年有冇咁好運呢？差得遠咯，到東京捧場嘅香港人，輸到焦頭爛額，但左丁山見到一位香港馬迷贏到笑喎，因為佢帶埋份香港馬經入場，香港馬喺六月三日沙田嘅賽事，安田紀念賽擺在第五場，日本東京馬場喺朝早十點鐘開賽，安田紀念賽放在第十一場，呢位馬迷睇香港馬經，下注九號「勝利飛駒」獨贏位置各一萬日圓，但佢填咗第五場，而唔係第十一場。
唉吔，行運執銀紙此之謂也，東京第五場跑出九號大冷門，獨贏好似係四十幾倍，呢位馬迷就咁贏咗五十幾萬日圓。至於佢有冇輸番落第十一場九號，左丁山唔知喎！
香港馬一出閘就中計，前速極慢，幾乎冇步速，排第十七檔嘅「步步穩」竟然可以追上第二位，「勝利飛駒」、「好爸爸」在前段被日本馬重重包圍在中間，死火現象早呈，就嚟入直路之時，日本領先馬狂放，扯散咗，「勝利飛駒」與「好爸爸」先至有機會衝上，但直路有六百米咁長，兩隻馬衝咗約一二百米就冇晒力，輸得好遠，睇住大熱門「大和主將」輕易取勝！
香港馬全軍覆沒，捧場嘅香港馬迷冇晒癮，提早鬆人，到新宿食飯去也。旅遊Ｗ好客氣，請左丁山到歌舞伎町食「燒物」，味道唔錯，只係新宿一啲食店面積甚細小，坐得唔舒服。食完之後，仲未到七點，大家分手各自行街，行到咁上下。肚又餓嘞，肥仔Ｋ做帶街，走上新宿伊勢丹嘅「壽司清」，呢間壽司店在築地好有名氣，伊勢丹分店亦唔錯，食拖羅（toro）平過香港，而且更新鮮。新宿於周末晚上人山人海，絕大部份係年青人，個個好似玩到癲咁款，女仔時興穿超短熱褲（牛仔褲）加黑色長絲襪，到咗六月，東京街頭仍然涼風陣陣，夠晒爽！