的士司機假如不是馬迷，沒有扭大收音機聽賽馬，從淺水灣出車回到中環這段車程，碰着塞車，大家聊一下天，還是蠻有意思的。「睇來唐英年會穩當下屆特首咯喎。」的士大佬也開始北京和台北化，老實不客氣跟你講政治，將車廂當做城市論壇。
「大陸睇人，好準的。」他說得頭頭是道。「不過相中曾蔭權這頭黑馬，好多人跌晒眼鏡也是真的。」他自言自語，自相矛盾解話。
「2012甚至2022，都唔使慌有普選了。」掟了幾個彎，他語重心長歎氣。「講句唔好聽，香港食粥定食飯，自己無得話事點菜的，係北京阿爺開恩落order俾過你，先至有餐晏仔落肚。」
咁，阿叔你鍾意粥定飯？
「求其啦，打工仔，醫肚之嘛。不過，有得揀的話，雲吞麵牛腩粗先至係至愛首選。問題係，阿爺點會咁順攤呀。」連職業司機都知道，政治沒有免費魚蛋河這回事，曾蔭權這個香港仔承諾在任內替市民爭取盡快落實普選，想當然係人都知，結局將會是：淨麵都無行，隻崩口碗得番個桔。
回歸十周年，無花無假中央政府冇呃你，食幾多着幾多，唔係天註定的。人定勝天，緊握基本法終極解釋權的那些人（當然不是曾特首與你）比天還高，蝸居在八呎七樓底的香港市民，低低地認命，一舖多一舖地摜落去吧。