電子商務越來越普及，網上拍賣成為不少年輕人賺第一桶金的途徑，拍賣網上的貨物包羅萬有，連一隻蕉也有人在網上拍賣，底價10元，直接購買價50元，不要以為是玩嘢之舉，真的有人陪賣家一齊癲。
用掛號寄上靚蕉
據網站資料，網民wingson_1986問賣家隻蕉有沒有購買單據，貨主esiconad強調，蕉在超市買，有單據，「條蕉仲好新鮮，只係搣咗落嚟後，突然唔想食，咪放上網睇吓有冇人要。」haha_keke_hehe質疑為何直接購買價高達50元，賣家稱因為要用掛號信寄上，「我驚用平郵會壓爛，其實條蕉咁靚，畀多少少錢用掛號都唔緊要啦！」
另一有興趣買家kinhing168要求刁鑽，「我唔想要皮得唔得？」esiconad甚爽快，「OK，冇問題，交貨時我搣咗塊皮先畀你。」有人擔心蕉寄到後不新鮮，他說：「放心啦，我擺咗入冰格，拎番出嚟解凍就食得。」這個非常香蕉拍賣最終有否成交不得而知，只知賣家還在網上賣葡萄，「呢種新品種提子，之前黃偉文食咗之後，就作咗首《葡萄成熟時》。」