地鐵噚日開股東會搞搞新意思，向中央證券登記公司租咗套即時點票機，每名股東入場前，獲派一個好似電視遙控咁嘅電子投票機，插上一張有股東資料嘅聰明卡，股東只需按1字話贊成，或2字反對，就可以完成投票，下一分鐘電腦就計出結果，即時投映出嚟。華華有份玩，好鬼過癮。
中央登記方面話，地鐵係首間租用呢套設備嘅上市公司，噚日就有幾間上市公司嘅秘書在場觀察，考慮日後租唔租。如果上市公司估計有超過200名股東出席股東會，其實已經值得租用，因為慳番好多舉手或填表投票嘅時間。
地鐵噚日就租咗超過1000部投票機。照咁睇，有好多散戶捧場嘅長實、和黃、新地同今日公佈業績嘅領匯，大可考慮租用呢批投票機。
叔叔嬸嬸問題多多
地鐵股東會上，一班叔叔嬸嬸小股東好踴躍提問──其實係申訴至啱，主要向主席投訴地鐵冇乜提供長者優惠、派息少、載客量不及九巴等等。
一位股東伯伯劈頭就話，地鐵揀喺九龍灣國際展貿中心搞股東會，好唔就腳，叫主席明年揀過第二度。一位股東嬸嬸就要求，地鐵董事唔好加咁多人工，派多啲股息畀小股東，即時博得全場掌聲。