我求大俠睇咗二十幾年外國波，成日見到啲外國球星接受電視台專訪，亦因而一直夢想會喺呢啲節目入面，睇到香港球星或者教練接受訪問。等咗咁多年，𠵱家夢想終於成真。
喺巴西接受訪問
我哋熟識嘅傑志助教鄭兆聰，會喺「現在」體育台今晚9:30播出嘅巴西足球節目中亮相，雖然呢部份只係幾分鐘，但總算幫手宣揚吓香港足球，為香港爭光！聰仔，obrigado（讀音：噢B加度；葡文，多謝嘅意思）！
身為傑志助教，又喺公仔箱講巴西波嘅聰仔，最近去巴西接受國際教練嘅訓練課程。由於佢係華人，加上精通葡文，好易引起當地傳媒嘅注意，亦因此成為首位香港足球評述員兼教練，接受著名世界足球雜誌節目《森巴足球世界2007》（Footbrazil2007）訪問。
望現役港將有此機會
講真，聰仔係名帥米路天奴域嘅高足，而佢對美洲足球嘅動向可謂瞭如指掌，當然有資格一登大雅之堂。佢會喺呢個訪問入面，講到對巴西足球嘅睇法，其中一個論點就提到，巴西球隊嘅教練通常得3個禮拜，或者1個月時間證明自己嘅能力，否則好快俾人炒魷魚，所以難度好高。
希望今次聰仔喺世界性嘅足球節目接受訪問，只係一個開始，如果將來有現役港將喺類似嘅節目亮相，而我哋又有得睇，咁就真係冇得頂啦！