65歲嘅曼聯領隊費格遜學做潮人？我求大俠唔係聽錯吖嘛？話說紅魔贊助商「一剔」最近送咗部iPod畀費Sir，等佢老人家可以聽佢至愛嘅NatKingCole同Sinatra嘅歌，點知費Sir第一個反應係：「呢嚿乜嘢嚟㗎？」唔係啩？點搞呀費Sir！
曼聯𠵱家陣內咁多後生仔，朗尼、基斯坦奴朗拿度同拿尼等全部「2」字出頭，費Sir仲唔學番多啲潮流嘢，容乜易同佢哋脫晒節。聽講費爵爺為咗同班後生仔打成一片，近日頻頻「上堂」學吓點用部iPod；於是搵咗佢孫仔積克做老師，實行調轉頭嗌番孫仔做「費Sir」，你哋話係咪好搞笑？
做潮人同紅魔小將溝通
其實費格遜都成65歲，要啲老人家學新嘢已經難，仲要學埋啲新科技就仲難。我求大俠成日喺街見到啲公公婆婆都係聽Walkman或者收音機，有幾可見到聽緊iPod㗎？今次費Sir唔怕面懵學玩潮嘢，無非想同曼聯班後生仔有多啲話題啫，我明佢用心良苦嘅。
記得孫仔積克第一句同費Sir講嘅說話係：「爺爺，呢部係iPod嚟㗎！係全球最偉大嘅發明！」聽講費Sir𠵱家好鍾意用iPod聽歌，仲識用晒所有功能兼正式成為潮人一族㖭！唔知費Sir第時講嘢會唔會「yo~」同「Checkthisoutman」咁呢？