鄭秀文日前接受訪問公開承認與許志安緣已盡，安仔前晚錄影《勁歌金曲》時，也只好和應，以三個「最好」來形容與這位舊女友現時的關係，又表示只要對方有事，他會兩囗插刀幫忙，但對未來兩人是否能復合，安仔說：「今日唔知聽日事」，似乎還想為兩人戀情留一點餘地。
許志安、何韻詩及洪卓立等前晚於將軍澳電視廣播城錄影《勁歌金曲》，王菀之則憑《面具》奪得勁歌金榜冠軍歌。鄭秀文（Sammi）與許志安的一段情兜轉多年，Sammi日前終在接受鳳凰衛視《魯豫有約》節目時，為二人正式畫上句號，直言與安仔緣份已盡，只能做好朋友。對此，前晚安仔回應說：「大家在心中啦，佢係我最好最好最好嘅朋友，前事不提，兩囗插刀。」
「今日唔知聽日事」
問到兩人的復合機會有多少？安仔聞言大叫：「嘩！今日唔知聽日事，總之今日大家係好朋友啦。」有沒有復合的想法呢？安仔說：「好難答，呢方面冇諗過，我自己都講緣份。」問他可有給機會予身邊女人？安仔則說：「我一直好open，緋聞就一瞬即逝，係假嘅，總之睇緣份。」
安仔透露其腳患已近康復，醫生叮囑他不可奔跑及蹲下，至於可不可近女色呢？安仔開玩笑說：「都得，又冇毒嘅，又唔係燒鵝，仲好呀，行氣活血，促進新陳代謝，仲可以刺激啲。」
另外，何韻詩最近因在網誌指有人抄歌，矛頭暗指古巨基新歌《錢錢錢錢》，因而掀起她與古巨基兩幫fans對罵，更有基仔的fans在網上謂要殺死阿詩，前晚她說：「今次我俾人拉落水，唔想繼續講。」阿詩大讚她的fans很乖，她說：「平時我有教佢哋有事唔好你鬧我一句，我鬧你一句。」是否覺得有甚麼偶像就有甚麼fans？阿詩說：「大家知我唔會撩是鬥非，唔會批評人，我有教fans唔好回應，得一、兩個激動啲，基仔fans好乖，都有嚟我blog叫大家冷靜啲。」
阿詩認衰多口
至於日前阿詩與基仔合照，基仔因沉默而被指沒禮貌，阿詩說：「嗰次大家都尷尬，我哋有微笑同sayhello，仲想我點？唔通嚟個擁抱咩，我哋都冇嘢，唔好太敏感。」下次見面會否尷尬？阿詩說：「應該唔會，唔知喎。」阿詩表示是次事件是她衰多口，不過她也只是在自己網誌發表個人意見，她說：「我係圈內人，食得鹹魚抵得渴！」
採訪：王崇穎
攝影：仇志德
