雖然《溏心風暴》已經播完，不過套劇嘅效應依然強勁。噚日夏雨（鮑鮑）、李司棋（大契）同關菊英（細契）就去咗清水灣道一個樓盤，煮鮑魚宣傳。
馮仁昭問佢哋對新樓盤有冇興趣，鮑鮑好搞笑咁話：「如果套劇入面嗰6億身家真係我嘅，咁呢度就真係唔拘呀。」之前成日俾人發現去睇樓嘅大契仲搞鬼，佢話睇通晒附近嘅交通網，仲研究埋邊個單位好，可惜鍾意嘅單位已經賣晒，唔啱心水。
戲味最緊要
大契又話自己搬屋最緊要都係睇畀唔畀養狗，仲話𠵱家唔搬都係因為隻愛犬。至於劇中乞人憎到暈嘅細契就話自己要同父母一齊住，父母係正式「香港」人，對九龍冇乜興趣喎。
之前《溏心》大結局有好多疑點，俾人有落雨收柴嘅感覺，大契噚日就話可能觀眾睇得太投入，所以好多細微之處都睇得好清楚，佢自己就覺得最緊要係有「戲味」，大契仲舉例，佢話以前有個婆婆睇《梁山伯與祝英台》心噏到差唔多就病死，所以編劇就將原來梁祝病死嘅劇情，改成兩人病死後變做蝴蝶，既淒美，婆婆心情亦都好番喎。