小偷先生：
如果你睇到呢封信，咁就代表我嘅不幸，你又爆開我新買嘅防盜鎖，成為第8位光臨寒舍嘅小偷。
小偷先生，信封入面有50蚊，你先攞去，當係意頭，然後畀啲耐性睇完封信。呢間屋就咁睇似乎有啲亂，但其實每樣嘢都有秩序，你想搵啲咩等我逐樣講畀你聽，請你千祈唔好整亂啲嘢，有啲嘢對你嚟講一文不值，但對我就好重要，所以我唔想返到嚟執餐死。
你嚟我屋企，主要係想「借」錢，我屋企嘅錢主要放喺銀行同股票行度；但為咗唔令你太失望，同多謝你嘅配合，我張電腦枱第一個櫃桶入面放咗283蚊，你可以拎走兩張紅底，留番啲散紙畀我買餸，如果你仲嫌少，就攞埋去啦！
賊仔暗偷股市明搶
但你千祈唔好攞走部電腦，呢部「腦」我買咗好耐㗎喇，雖然玩接龍都嫌佢慢，但我仲要用佢嚟炒股，計吓數、做吓分析。其實股市同你都幾似，你就「暗偷」，佢就「明搶」，之前我摸頂買咗8號仔，家吓唔見一大截，不過算喇！講番正題，你抬部腦走都要call人運走，好麻煩啫！嗱，個鍵盤底仲有兩嚿水，你攞埋去喇！至於部電視，係幾十年嘅舊嘢，如果你真係鍾意，咪攞埋去囉！
為咗多謝你嘅體諒，門口地氈有50蚊，當係小小心意。睡房畢竟係私人地方，可以嘅話，請你盡量唔好入去。如果真係要入，你會見到喺床頭有個櫃，入面冇錢，只有幾本股票分析書，睇吓就好，千祈唔好攞走，特別係嗰本《炒股炒成億萬富翁》，係我嘅命根同夢想。
其實，我屋企真係冇乜嘢可以孝敬你，但係唔使一個鐘就搵到差唔多六嚿水，都算唔錯，時薪仲高過我，仲好搵過炒股。嗱！趁好就收，落去樓下間餐廳食番幾個撚手小菜醫醫肚喇。
屋主上
http://www.somoney.com.cn/stock/13/55619.shtml
報料站
歡迎提供網上財經趣聞，資料一經採用，酬100元。
請附姓名、電話及電郵地址，交[email protected]