講完噚日講過嘅強醫金，就要講番前日嘅花旗國樓市。前日，孫柏文講過話花旗國樓市爆煲，出現斷供潮，以前就可以收回物業，然後進行拍賣。不過因近年花旗國樓市出現咗好多「創新財技」，令收樓權模糊不清，所以引發大量收唔到樓嘅情況。
我話過，攞錢出嚟借錢畀人嘅單位，例如強積金基金、有錢人等等，因為喺斷供嘅情況下都收唔到樓，一定會律師信滿天飛，告啲例如投資銀行嘅中介人。
早知今日 何必當初
話口未完，啲投資銀行中介人因為斷供潮，又出現官非。話說，有好多大鱷對沖基金，睇中樓市爆煲，所以就大手拋空啲靠樓宇按揭供款去還錢嘅債券。因為如果出現斷供潮，張債券都冇收入，點可以唔跌。
點知，就有投資銀行BearStearns出嚟「拯救」啲苦業主，令呢啲按揭債券唔跌。BearStearns原來除咗賣好多呢啲按揭債券之外，仲要賣咗好多「斷供保險」畀買咗呢啲按揭債券嘅人，一旦出現斷供潮，就要賠錢。BearStearns會同啲苦業主「講數」，改變還款年期、還款利息等等，盡量唔希望出現斷供。
就係咁，令啲好似孫柏文咁，覺得花旗樓爆煲嘅大鱷對沖基金媽媽聲。今日，我想用隻金手指去篤醒BearStearns，教佢兩句中文：第一就係螳臂當車；第二就係早知今日，何必當初。
金手指網誌： http://phatdat.blogspot.com