退休前輩B哥同朋友到處遊玩，最近去完「昂坪360」，讚不絕口，佢搭纜車之日，天朗氣清，東涌嘅空氣污染指數出奇地低，於是B哥視野遼闊，遠景近觀，無不幽美。B哥話：「未去過嘅，一定要一試，排隊都抵。上到山，人有三急，搵到個公廁，你哋要去試吓。」搭纜車試公廁？有冇理由呀？B哥話：「當年我哋老友賓架L做市政局主席時建造㗎，用咗三百萬，直情係模範公廁，全港最好。」
B哥講起廁所，不禁想起廁所問題大矣哉，地鐵與九鐵合併，法例草案、奇峯突出，議員為咗地鐵站應唔應該有廁所而與政府爭執，如果他日兩鐵因廁所而合併不成，香港廁所必定成為國際新聞。
與建築公司總裁傾起地鐵廁所，佢話：「你問我，我一定唔贊成起，成本太大，工程困難，現在地鐵站冇廁所，多年來大家習慣晒啦，每人搭地鐵平均唔會超過半小時，半小時都唔忍得？如果啲尊貴議員話要在地鐵站起廁所，技術上冇話唔得嘅，畀夠錢，我哋一定造。」佢話唔少地鐵站在地底，廁所穢氣好難吹散。會令地鐵乘客行過時，好難受，甚至影響衞生。
建築專家之言，類似以前麥當勞香港創辦人伍日照博士講嘅「最後5%」道理。伍博士講過每件事做到95%美好，並不困難，但要做到96%，97%，98%以至100%完美，每一個新增百分點都要好大成本與努力，值唔值得做，要由公司最高當局（地鐵嘅最高當局就係政府）決定，是否願意付出高昂邊際成本。講到最收尾，唔通由廖秀冬局長決定？以廖局長嘅環保專家性格，似乎唔會贊成地鐵站起廁所噃。一位朋友去過環保局開會，熱到佢跳舞，因為室內冷氣係二十五點五度，唞氣甚艱難，足證廖局長夠晒環保。地鐵站有廁所嘅話，會增加排放空氣污染，用多咗水電與紙張，好唔環保啫。地鐵站內嘅職員有自己嘅廁所，如個別乘客有特別緊急需要，大家開聲向職員借用，相信佢哋會接到上頭柯打，盡力與人方便。