多年以來，華人首富李嘉誠每一番言論、每一個動作，響香港上上下下各階層都發揮着不可思議嘅指導性作用。佢老人家5月17日響長實同和黃股東會上，對市民熱衷炒股，感慨良多。佢話：「最緊要問問自己用咩嘢同人競爭……係咪淨係靠炒股票投機呢啲行為，呢個絕對唔會，我哋要實實在在去做嘢……炒股票係要比較小心啲，個市有爆破嘅時候，最多損失會係普羅大眾。」
這邊廂超人李嘉誠警惕股民小心；那邊廂佢自己喺3月公佈業績後，連續幾日不斷增持長江實業股份，超人當時強調：「增持長江唔係對股市有信心，只不過對自己公司有信心。」
超人呢個唔係投機只係有信心嘅行動，由上個禮拜二開始又不斷出現。自禮拜二到呢個禮拜一，超人密密買長實，上個禮拜，四日內用咗8.1億買咗800幾萬股長江一號，呢個禮拜一佢又用咗4600幾萬買多45萬股。
表現信心唔算炒股
各位千祈唔好話超人有口話人，冇口話自己。佢老人家呢啲唔係叫做熱衷炒股，只係熱衷增持，係有信心嘅表現。有金魚缸小油魚話，超人叫大家唔好掛住炒股，其實係叫股民咪搞亂檔，阻住超人表現佢嘅信心，呢啲唔算炒股……
小油魚又話，小股民鍾意嘅可以掹超人衫尾買長江一號，記住呢啲係信心嘅表現，唔係炒股。雖然超人五日嚟買咗差唔多850萬股長實，賬面贏咗差唔多2000萬。但再講一次呢啲係信心嘅表現。華華知超人唔鍾意傳媒「無中生有，利用李嘉誠嚟促銷」，所以開頭原文引述超人喺記者會上講嘅說話，華華想同超人講我冇亂作。
[email protected]