接駁東涌至大嶼山交通的登山纜車昂坪360，去年建成後曾多次發生故障，但王喜仍大讚纜車方便兼抵坐，日前他親身試坐時，笑言萬一遇上纜車停頓，以88元來回價可超時飽覽美景，簡直「有賺」。
王喜早前曾隨無綫攝製隊坐接駁東涌至大嶼山的纜車昂坪360，到大嶼山拍攝長劇《珠光寶氣》外景，但當日因開工來去匆匆，無暇欣賞離島風光，日前他以88元來回票價，再坐登山纜車遊大嶼山，依然感覺興奮，當他坐進車廂後，視線也不停作360度旋轉，飽覽沿途景色。
拒坐巴士遊覽
對於曾登珠穆朗瑪峯的王喜而言，坐纜車時從背後的氣窗送來颼颼清風、低頭見茫茫大海或險峻山頭，都是濕濕碎之事。雖然纜車通車後曾多次發生故障，令乘客滯留車廂，但王喜一樣不擔心，還笑說：「如果我遇到咪賺咗囉，坐一次20分鐘車程，萬一遇上強風，坐多1小時咪仲賺！」
王喜更大讚登山纜車建成後好處多多，他說：「建成咗係好事，大嶼山嘅交通仲未完善，坐巴士去真係唔容易，尤其對老人家，有纜車會令老人家上寶蓮寺方便好多，今次我第二次坐，都係感覺好好，我死都唔再坐巴士去大嶼山㗎啦，太辛苦，除非大嶼山會有更好嘅路同更新嘅巴士。」
冇膽玩笨豬跳
王喜不怕遇上纜車故障，更加不畏高，怕的只是坐纜車時聽到喧嘩聲，他笑說：「因為大家坐車時見到環境靚會好興奮，但坐喺封閉嘅車廂入面，嗰啲叫囂聲，好似6個人迫喺卡拉OK細房。」不過，膽生毛的王喜原來不敢接受笨豬跳的終極挑戰，故他很佩服陳冠希在澳門玩笨豬跳創世界紀錄，王喜笑說：「我戥陳冠希驕傲，係香港人嘅一大成就，佢亦都為年輕人爭一口氣。我唔敢玩笨豬跳，係因為我有負擔，最驚唔斷纜，冇得一了百了，真係冇法。」
採訪：朱倬誼
攝影：葉君海
