香港董事學會早排搵城大做咗個調查，發現喺受訪嘅174間上市成份股公司之中，竟然每名董事平均孭咗2.68個董事會職務。華華好奇怪，乜香港真係咁少人才咩？身兼多職嘅名士，究竟可以有幾盡責，為每間個別嘅公司睇實盤數先？
辭職濫用私人理由
董事學會主席黃紹開（Peter）解釋話，自從港交所改咗上市規則，加強咗擔任董事嘅門檻，要有咁上下專業資格先收貨，再唔似以前係人都得，而董事職責又加多咗，搞到冇乜人肯接火棒，全港董事變得供不應求，即係話責任喺港交所度，因為交易所要求太嚴謹。佢相信每名董事都係專業，就算百足咁多爪，都唔會有利益衝突，只係驚分身不暇，未必做到最多啫。
可能主席貴人事忙，董事學會嘅前主席許浩明，舊年就忙得滯而搭沉船。身為海域系副主席嘅佢，好遲先揭發公司嘅失款醜聞，但當時已回天乏術。之不過，海域主席葉劍波至今未蒲頭，老婆傅明憲繼續出入ball場，勁多「盡責」董事以「私人理由」辭職跳船，可憐小股東血本無歸。
黃紹開噚日補鑊話，早前該會已經出咗指引，以後無論邊個董事辭職，除非關連到個人疾病同埋家人，否則一概要公開原因，皆因以「私人理由」辭職已被濫用，要畀股東同大眾有知情權喎。