人物：朱茵、黃貫中
時間：2003年10月
地點：香港
經過：朱茵係惹火尤物，身為佢男友嘅黃貫中（Paul）自然令到好多男士既羨且妒，不過03年10月，阿Paul被倪震大爆朱茵因為宗教信仰而同佢禁慾5年，即刻令人對阿Paul由羨慕轉為同情！
當日倪震為電台節目《絕情谷》搞咗個「絕頂好男人」選舉，阿Paul排第5位，倪震話好佩服阿Paul，指佢雖然血氣方剛，但為咗尊重女友嘅信仰忍住唔做。事後阿Paul被問到禁慾5年呢件事時，話自己只係普通人，唔係聖人，佢只係尊重女友，當傳媒問佢係咪忍得好辛苦時，阿Paul就用音樂將話題輕輕帶過，佢話：「你唔見我嘅音樂越嚟越火爆咩？」
至於朱茵就話覺得呢個話題好核突同尷尬，由於之前朱茵同阿Paul去泰國慶祝生日俾傳媒偷拍，適逢事後Beyond另一成員黃家強又取笑阿Paul同朱茵禁慾5年呢件事，令到朱茵好鬼扯火，懷疑家強係二五仔向人洩露佢同阿Paul嘅行蹤，阿Paul夾喺女友同老友中間，真係左右做人難。
本欄逢周一至周六刊出