上個禮拜部車攞咗去整，加上好耐無搭過巴士，於是就特登搭巴士返工，點知一上到車先驚覺原來家陣嘅巴士係咁鬼熱！記得幾年前巴士仲俾人鬧凍過雪房，嘥電兼唔環保，點知家陣就環保到過龍，車程行咗一半我個背脊依然係濕漉漉，肌膚透現於恤衫之間，好不性感。
其實節約冷氣呢家嘢唔單止香港實行，日本已經實行咗N年，唔少去過日本旅遊嘅人都覺得日本嘅旅遊巴、商場等嘅地方唔夠凍，不過當時嘅心態係入鄉隨俗，仲有啲讚歎日本人嘅環保意識㖭！之但係講到環保意識，睇怕香港同日本都鬥唔過我哋嘅祖國；有日晨早起身扭開電視睇CCTV（唔係閉路電視，係中國中央電視台），見到新聞報道員介紹內地某地方嘅公共巴士，原來環保到連冷氣機都無，而佢哋提供冷氣嘅方法，就係將一大嚿冰放喺車廂中間，係就係濕啲，不過坐喺附近肯定勁清涼，話唔定當超等咁收貴啲！
悠穎馳
豪邁不羈，愛車如命，聽幾下引擎聲就知咩車！