證監會噚日發表年報，業績大豐收，但主席點都唔肯講會唔會減收費，只係講埋啲類似好天收埋落雨柴咁嘅說話，令一眾股民失望。
華華於是攞起佢本年報睇吓，發現一項有趣資料，由前主席沈聯濤爭取返嚟，舊年喺灣仔會展搞嘅國際證監會組織周年大會，唔單止「有助提高香港金融中心聲譽」，原來仲有錢賺㖭，是關年報內嘅其他收入一欄，列出搞呢個國際會議，證監會居然袋咗502.5萬銀，真係服咗沈主席。
華華仲喺份年報發現，佢哋首次攞咗美國、英國同澳洲三個監管機構，近幾年嘅職員數目同總支出做比較，唔知佢哋淨係列出呢兩個項目有乜目的？由於澳洲舊年冇資料，華華只可將港、美、英三地平均每個職員攤佔支出作比較，表面上港證監好似最慳，只係122.3萬，而美英就分別係191.9萬同埋161.06萬蚊，之不過，人家要監管嘅上市公司同埋金融從業人員比我哋多好多，實在唔知佢哋整呢個表嚟做咩？