唔怪得啲記者咁鍾意小小超。李察王子出席股東大會，真係有料到，對答如流，毫不示弱，小股東質疑佢有冇管治能力，李察立即答：「論能力我與你一樣係股東，若你應該有能力，下次股東大會可以擺自己出嚟，畀股東投票選為主席，暫時睇你嘅問題，我唔會投你一票。」好少有公司主席如此答覆股東嘅，如非充滿信心，一般主席肯定會帶股東遊花園。
𠵱家公司主席與CEO唔係一定坐得安穩㗎，啲基金經理一發起惡嚟，隨時逼董事會下台。基金點先至發惡呢，就係見到公司股價不振，未能反映真正公司價值，例如TCI（兒童基金）之強逼荷蘭銀行賣盤，至於電盈嘅真正公司價值，經歷科網股爆破之後，跟隨全球TMT股下跌，跌幅與全世界嘅TMT股走勢差唔得幾遠。不過老友記者Ｂ約喺舊價二十八元（相等新價一百四十元）時追入幾手，想返家鄉唔知使唔使十八年後。
李察今年引入新意思，話明「如果明年今日股息加股價跌輸畀恒指，無論業績多好，執行董事的獎金（花紅）將不會超過原定的一半。」睇番電盈股價，自○一年起年年跑輸畀恒指，李察早啲有呢個政策嘅話，啲執行董事應該冇晒啲獎金。
遲好過冇，呢個承諾好嘢呀，值得其他公司跟隨、仿效，例如二八二嘅股價大跌，無論業績點樣，肥佬黎應唔應該派花紅畀董事呢？一般嚟講，公司執行董事會為咗花紅，努力爭取在可能範圍內嘅最大利潤，但利潤增長有時不能反映於股價上，執行董事們係唔係要檢討一下，是否自己冇盡努力向分析師，基金經理，以至散戶，推廣公司嘅股票？投資關係（investorrelations）是否做得唔好？公司管治是否依照最佳標準？
董事花紅與股價（相對於大市）掛鈎，係一個好主意，電盈現在有四大業務範圍──固網、Now、寬頻與3G流動電話，照計可以發揮四合一嘅整合力量，成為全球最獨特嘅TMT股，傳統固網生意冇乜前途，係人都知，但其他三瓣合流，競爭力好大㗎，睇吓電盈董事如何發揮啦。