好多人都知豐田嘅汽車生產量已經超越咗通用汽車公司，成為世界第一，所以唔少人都以為日本嘅汽車工業一片繁榮，不過有啲嘢真係唔講唔知，原來日本汽車喺國外大賣嘅同時，日本本土嘅市場卻一直萎縮。
根據最新嘅數字顯示，日本國內今年五月份所銷售嘅新車數目係378,800架，比去年同期下降6%，係31年來嘅低水平。
或者你會覺得呢個現象好奇怪，唔通日本人唔再Buy自己國家生產嘅車，而走去買外國車，乜日本人唔係好愛國嘅咩？非也，日本汽車銷售之所以減少，唔係因為日本人唔再愛國，而係日本人口正處於負增長，即係人口越嚟越少，人少咗，自然買車嘅人都少咗。日本對人口負增長問題一直好頭痛，家陣甚至推出生仔有錢派嘅社會政策嚟鼓勵日本人多啲生仔。所以有時睇汽車嘅資訊唔單止可以學到關於汽車嘅嘢，連日本社會現狀都可以了解到㗎。
悠穎馳
豪邁不羈，愛車如命，聽幾下引擎聲就知咩車！