《溏心風暴》播完，奸人個個有着落，偏偏演見利忘義嘅舅父波（阮兆祥飾）不知所終。你知啦，全港觀眾包括我，最想睇壞人有咩收場！故不惜「以車會友」，諗住借架百萬辣跑畀佢過吓虛榮癮，順便訪問兼問舅父波結局。「想揸咩車？梗係七人車啦，車櫳要夠大，屋企人坐得舒服啲！」哦，原來係我小人之心！
記者：梁美甜
攝影：陳陶鈞
現實中錫燶屋企人
《溏》已結局，好多觀眾意猶未盡，公司亦有好多同事託我向祥仔攞料，想知舅父波嘅結局會係點？「梗係搵到個靚老婆，結婚生仔啦！」咁正經？祥仔笑說：「我以為自己會做阿Gil嗰啲戲，即無間道，起碼細契一直都信我，我要幫番二家姐、得得地都合理得多啦！」可惜戲中無交代，我只係覺得佢好鬼衰，連親家姐都唔理，幫細契恰自己兩位家姐同埋姨甥仔。
誰不知現實中嘅祥仔鬼咁錫佢親家姐同姨甥仔，「我不嬲都唔鍾意跑車，買車都係重功能同舒適，仲要環保，𠵱家就最想買部七人車，可以俾家姐同姨甥一齊去玩去Shopping。」估唔到祥仔會係環保分子，仲咁Family，既然開到聲，就索性搵部日產Serena七人車俾佢過吓手癮。
全家出動都無問題
祥仔揸住部七人車喺飛鵝山兜咗一圈，又上斜落斜再行彎彎曲曲嘅路，「我以為七人車通常都無乜力水，呢架就夠靈巧，車身又輕，2,000c.c.估唔到咁好力喎，坐滿七個人都掂啦！」何止，呢部車仲符合環保署汽油私家車稅務寬減計劃，最高可減成2萬蚊稅，即係22萬多啲就出到車，「咁筍？哈哈！」祥仔笑着說，外加招牌笑聲。祥仔素來給人都是搞笑形象，佢亦不諱言自己樂在其中，而且為其他人帶來歡樂係無上福氣！突然之間，祥仔變得很偉大很有承擔，好值得欣賞！
貪日本車冷氣夠Cool
祥仔直言香港揸車都係會揀日本車，佢自有一番理論：「歐洲車始終係俾人喺歐洲揸，無諗過會長時間喺三十幾度高溫之下運作，我之前嗰部歐洲車咪就係咁成日壞囉！」
「日本車最正係冷氣夠凍，啱晒好似我咁大汗嘅人。車櫳空間都好重要，話晒我屋企人個個都好似我咁高大㗎嘛！」祥仔忍不住大笑。「內櫳幾張椅雖然可以摺起，令空間大啲，不過再闊落啲就更好。」
做善事唔使攞嚟講
祥仔自言買車唔係追款追辣，「大c.c.嘅車食油啲，唔經濟又唔環保，可以慳錢又環保嘅話就最好，我始終覺得環保係要由自己開始做起。」日產Serena就完全符合環保要求，2,000c.c.坐足七個人仍非常有力。「我好欣賞余慕蓮，佢攞自己嘅退休金返大陸起學校俾小朋友讀書；其實好多人都會做善事，但就唔會專登話畀人知，好似我咁！」祥仔鬼馬地笑，真係信不信由你！
日產Serena規格
引擎：1,997c.c.直列四汽缸，
16氣閥CVTC
馬力：137ps/5,200rpm
扭力：20.4kg-m/4,400rpm
傳動：XTRONICCVT電子智能無段變速波箱
原價：$248,000
扣稅後售價：$228,000
查詢：23688235（合誠汽車）
祥仔爆料：原班人馬再拍過
我問祥仔自己為自己創一個結局，佢直言無咁嘅需要，「咁樣大家反而會記得我。」招積得佢吖！坊間話《溏》劇會開前傳呀後記呀，係咪真呢？「《溏》劇其實有好多FlashBack已經交代過好多前因，開前傳好難，而且無理由叫班前輩上個後生妝演成個劇㗎！不過公司會用原班人馬開拍另一套劇，故事已經寫緊，下年一月應該有得睇㗎喇！」那麼我就期待《溏》劇原班人馬的變奏新作囉！
MegaBox路人問結局
