上次喺度同大家講過，馬會新開朝早開波嘅美職聯受注賽事，將會順勢連同巴甲及美洲區國際賽等，同喺早上開波嘅賽事，設立「6寶半全場」彩池吸引投注者。不過，可能鐵人都要休息，好似上周六，喺周日朝早開波嘅6場美洲賽事，受注時間唔足夠，各項投注途徑喺開波前1小時仍然暫停運作，謂之更新系統。
免費午餐睇得唔食得
嗰朝早，凌晨5點2開波嘅3場巴甲聯截止受注之後，接近兩小時暫停受注任何賽事。雖然下一場波係要到7點半開波嘅美職聯新英倫革命主場對皇家鹽湖城，但竟然要到7點至開始重新受注；如果呢口由新英倫革命呢場做頭關嘅「6寶半全場」，唔係一早買定的話，即係你要玩，都只有半個鐘頭時間落手。
其實，好高興見到足智彩進一步，提供埋喺我哋香港時間早上開波嘅美職聯及其他美洲盃賽賽事，有自持力而又好此道者，真係全日24小時皆有得玩。
但係既然早上受注賽事越來越多，凌晨5點至7點嗰段暫停受注期，真係要諗諗點改善至得。即使會喺嗰段時間落注嘅人數有限，都唔能夠忽視呢班小眾吖。更何況，睇完深夜嘅直播波，見到幾個鐘頭後仲有波玩，臨瞓前想落番小注，睇下瞓醒有冇免費午餐食，都冇機會噃！
華度唔鼓勵大家乜波都賭一餐，只係你開得盤，受注時間亦應該再配合得好啲，畢竟越來越多人，鍾意臨場至嚟落注嘛。
文：華度