新股熱潮，一啲規模有限嘅財經公關為咗搶生意，有時會出啲騎呢招。早排有個港人同幾個大陸佬開賭局，點知輸咗幾十個，後嚟先知跌入天仙局。以為個故事就咁完？梗唔止！
據講，嗰個係鬼天仙局，實情嗰個港人係某財經公關公司嘅老闆，為咗𠱁幾個大陸老細歡心，自己鬆章，又怕俾人唱，所以咪話自己跌咗入天仙局囉。
騎呢招唔止得呢一道板斧，話說呢個公關公司老闆，請人分兩類，一類可以完全唔識金融財經，但一定要有身材、有外貌，仲要夠嗲，佢哋負責前線搵生意。至於第二類，唔使外表，因為只係負責後勤，前線班靚公關搵到生意返嚟就任務完成，其他粗重嘢就由呢班後勤搞掂。
整cheap晒行頭
呢班靚公關去親做pitching，個個deepV套裝出場，對啲賓架嚟講，養眼還養眼，但做嘢揩大鑊就出事，所以都寧願用番啲正正經經嘅公關公司，不過，一年流流長，點都要醒番一單半單畀靚公關，唔係邊有免費油揩。
正所謂「樹大有枯枝，族大有乞兒」，雖則各有各搵食，但係班正正經經嘅財經公關，一聽到呢啲騎呢公關就好鬼𤷪，嬲佢哋整cheap晒個行頭，搞到有啲上市公司高層以為，所有財經公關都揩得油，你話係咪多得佢哋唔少？
[email protected]