同事求大俠鬼鬼祟祟同我牽牛講，華倫西亞前鋒韋拿踢完兩場歐國外後發惡夢，夢到自己返唔到西班牙──因為本護照印咗個「攰」字，被海關懷疑係偽造……我諗諗吓，好似有啲玄機，所以禮拜六西甲打吡戰，利雲特主場鬥華倫西亞，「細佬」受讓平/半，撐實下盤冇得走！牽牛
華倫聯賽可謂無欲無求，第3同第4都係踢歐聯外圍賽，球員鬥心真係一大疑問，換轉你係佢哋，心態都好可能係等放暑假去旅行啦！
另一邊廂，情況剛好成強烈對比，「升班馬」利雲特𠵱家同尾3嘅皇家蘇斯達差6分，今仗只要增添1分，就成功護級上岸，保住西甲席位，呢班由過氣名將好似湯馬斯、卡普、薛馬歷亞同廸侯等組成嘅「棄將兵團」，當然要為自己爭一口氣，提早護級成功，對大家都係好事。
西班牙兩戰皆作客
況且，剛剛過去嘅國際賽期，西班牙分別踢咗兩場作客波鬥列支敦士登同拉脫維亞，而華倫就有近半隊曾經落場，其中射手韋拿、翼鋒祖亞昆、守將馬真拿就兩場都有踢，加上舟車勞頓，你話唔攰就勢係假啦，吓話？
好衰唔衰，韋拿喺第2場對魚腩列支敦士登，完場前12碼宴客，或多或少對其信心會造成影響，球迷應該留意。
利軍主場七成不敗
另外，再睇今季華倫嘅作客成績，查實真係唔多掂，事關佢哋聯賽作客得勝率僅得33.3%，以爭標隊嚟講就唔合格，而且，首席射手韋拿聯賽轟入14球，但作客偏偏唔多掂，僅入過4球咁大把，佔全部入波嘅28.6%，唔通一到客場，就着錯射門鞋？
相反，對手利雲特聯賽主場嘅不敗率有成66.7%，下游球隊嚟講，真係唔錯㗎。
講完一輪，我牽牛夠膽講呢場華倫西亞市「打吡」，「蝙蝠軍團」肯定飛唔起，如無意外，「細佬」利雲特受讓平/半，捧實下盤正係好路！
另外，今周心水波膽係皇馬作客贏薩拉戈薩2:1、3:1，前者上仗剛以3:1殺退拉科魯尼亞，今仗開多鋪其實機會唔低。
投資特攻隊金句
「華倫聯賽可謂無欲無求，第3同第4都係踢歐聯外圍賽，球員鬥心真係一大疑問……」
熱選大藍籌
星期六12
讓球
利雲特（下盤）
評語：唔使諗咁多，「打吡」唔係睇牌面，最緊要識捉路，呢鋪係時候「細佬」發圍喇！
冷選23線股
星期六16
波膽
皇家馬德里勝3:1(12倍)
評語：皇馬由季初的「細」波膽到季尾的「大」波膽，絕非空穴來風，跟住路博佢哋「翻冧」3:1。