金管局噚日公佈，外滙基金票據及債券成交量嘅最新市場莊家排行榜，呢個公佈係每六個月編製一次，目的當然想推動啲莊家更加活躍開盤，令到個債市流通啲，香港可以發展成為區內債市龍頭，所以排名最高嘅12家銀行，會獲得當局一啲獎勵，好似認購某啲發行債券時，有優先權咁。
按外滙基金票據（年期1年以內）成交量計，結果梗係本地第一大行嘅獅子銀行滙豐排頭位啦，第二位係渣打，第三由中銀香港爭上，即係三大發鈔行壟斷市場莊家三甲之位，賽果都好合理。
之不過，長年期嘅外滙金債券排名榜，就有少少意料之外，除咗頭一二位同一年期嗰批一樣，第三位居然由大新銀行榮膺，排名仲高過花旗一級。