唔經唔覺，又到咗應屆畢業生嘅搵工季節。求職者點先可以提高勝算呢？《CNNMoney.com》就列咗畢業生求職時經常會犯嘅5大錯誤：
錯誤一：畀父母接觸僱主
𠵱家多咗好多所謂「直升機父母」（HelicopterParents），即係指一群「過度介入」仔女生活同「過度焦慮」嘅父母，佢哋好似直升機咁，喺子女活動範圍上空盤旋，無時無刻守望住仔女嘅一舉一動。但係無論父母對你有幾寵愛都好，千祈咪帶埋佢哋一齊去見工，免得被人覺得你好似「裙腳仔/女」，既唔專業又唔夠成熟。
錯誤二：網上公開無謂嘢
正所謂「若要人不知，除非己莫為」，千祈咪亂咁喺網上公開令人不安嘅內容，例如上載淫猥嘅相，或者亂噏有損個人形象嘅言論，因為未來老闆極有可能喺網上搜查一切有關你嘅資料，所以最好能夠做到，喺現實同虛擬世界嘅言行舉止都表裏如一。
錯誤三：冇善用人際網絡
搵工要漁翁撒網，唔需要怕俾其他人知道，而每個人都有自己嘅人際網絡，當中包括父母嘅朋友、朋友嘅父母，等所有人知道你搵緊工，講唔定佢哋可以幫手打聽空缺，甚至提供職場資訊，搵到工嘅機會自然高啲。
錯誤四：唔講多謝冇禮貌
被父母寵壞嘅新生代嬌生慣養，好多時連簡單一句：「多謝」、「唔該」都唔識講。因此，初出茅廬嘅畢業生如果想成功突圍，表現親切、以禮待人，老闆對你嘅印象自然就會深刻啲。
錯誤五：留言錄音嚇壞人
家陣好多人都鍾意為手機留言信箱，錄低啲古靈精怪嘅開場白，朋友聽到會覺得好搞笑，但未來僱主聽完就可能覺得你好幼稚，所以如果你等緊僱主打電話嚟，約面試時間或者取錄通知，最好就係事先改過啲正經嘅留言系統開場白。