剛剛喺上月19號舉行過婚禮嘅韓國變性藝人河利秀，同佢老公鄭英振（Mickey）嘅恩愛程度真係無人能及。
互咀顯恩愛
阿Net最近上過去河利秀個blog度，發現佢唔單止公開自己嘅閨房照片畀網友觀賞，仲將成個網站佈置成同佢屋企一樣嘅粉紅色，真係睇到骨都痹，不過有唔少網友都祝佢哋永遠幸福。
除咗個人簡介部份之外，河利秀blog裏所有圖文都係佢以及Mickey嘅結婚情報，包括當日婚禮情況，同兩人喺泰國蘇梅島度蜜月嘅相片，淨係佢哋互咀嘅肉麻照，阿Net至少都數到有5張。河利秀自稱為「最正美女」，又喺主頁度寫上：「我與世界上最重要的人結了婚，希望大家都能找到幸福。」
至於河利秀公開嘅閨房照片，全間房都係以粉紅色為主，床上面仲擺咗個心形咕𠱸，整體佈置好浪漫同好有公主feel，唔怪之得河利秀寫咗句：「是不是很漂亮啊！」唔知佢同Mickey會唔會好似早前為主持嘅節目所拍嘅宣傳照咁，臨瞓前用枕頭互打耍吓花槍咁呢？
http://www.cyworld.com/loveharisu
版主：阿Net
本欄逢周一至六刊出