時間：2000年5月10日
地點：劇集《男親女愛》慶功
人物：黃子華、鄭裕玲、蕭亮
經過：憑一把靚聲廣為觀眾認識嘅蕭亮，2000年喺外國回流返咗香港，佢仲俾無綫邀請參演處境劇《男親女愛》，可能觀眾專注劇中男女主角黃子華同鄭裕玲，所以次次宣傳，佢哋一定成為傳媒嘅焦點人物，身為前輩嘅蕭亮唔知係咪睇到酸溜溜，佢連續幾次出席有關宣傳都乘機攝位搶鏡。
最初眾演員不以為意，對於蕭亮攝位舉動唔係咁大反應，但當佢次次都係咁，仲越嚟越過份，大家開始覺得佢乞人憎，仲俾記者封咗佢做老薑攝石人，不過蕭亮不單止冇嬲，反而好受落。
老薑攝石人蕭亮2000年5月10日宣傳《男親女愛》又發揮攝石神功，影大合照時企圖趁混亂攝位，點知眉精眼企嘅鄭裕玲立即拉咗黃子華上去，仲用個背脊頂住蕭亮，咁蕭亮惟有打梁舜燕主意，去攝佢個靚位，無綫高層曾勵珍見狀馬上喝止：「你成個人遮住Lily姐（梁舜燕）。」
對於成日攝位博上鏡，蕭亮自辯話：「我係為你哋（記者）張大合照嘅構圖着想，咁呢度有個窿唔好睇嘛，我咪攝入去囉！」蕭亮嘅演技係唔錯，不過佢成日攝位嘅行為令到同劇演員好討厭，唔知係咪咁，近年已絕迹幕前。
本欄逢周一至周六刊出