無綫劇集《師奶兵團》成功吸引觀眾，除幾位「師奶」和「小男人」演技出眾外，一班配角也功不可沒。老戲骨余子明和李楓這對鬥氣老人固然精采，而一班小朋友的演出也令劇集生色不少。要數最得觀眾歡心的小朋友，除了見慣見熟的Jacky仔之外，相信非8歲的「馬仔」和「芳芳」莫屬。
採訪：藍文浩 攝影：陳慧安
場地提供：冒險樂園（西九龍中心）
晚晚瞓四個鐘
劇中老竇艾威包二奶又走佬，「馬仔」梁逸宇與媽咪商天娥相依為命，要擺街邊檔賺錢。現實中的逸宇卻坦言最愛「走佬老竇」，他一派老積口脗說：「我拍《天生一對》嗰陣已經識佢（艾威），都想再同佢合作㗎，因為好好玩，我成日追住佢嚟打，不過佢有時都會蝦我囉，其實肥導演林志華都好錫我㗎。」
再度與艾威合作的逸宇，方臉細眼與劇中老竇艾威的確有幾分相似，難怪曾有傳二人是親生父子。娥姐曾說逸宇可愛得似塊磚頭，「大大隻」的他原來自5歲起已入行，首次拍劇更令他覺得十分開心，他說：「拍劇可以玩，又可以出外景，但係最鍾意都係入廠，因為可以去自動售賣機買嘢食，出外景就冇嘢食喇。」
片場內做功課
馬仔最着重的就只有食，不過上學期間兼職拍劇，令到場陪伴拍攝的家人苦不堪言，媽咪梁太說：「日日都係帶埋書包拍劇，溫書做功課全部都喺廠入面搞掂，拍完返到屋企攰到不得了，沖涼都要第二朝先起身沖，晚晚都係瞓得4、5個鐘咋。」
肥娥之子梁逸宇
年齡：8歲
入行經過：於街上被星探發掘
演出作品：
電影：《天生一對》、《超班寶寶》、《童夢奇緣》
廣告：地下鐵、海洋公園
資料來源：《蘋果》資料室
乖乖女扮反斗
劇中飾演「芳芳」的劉靖琳，有個易服癖爸爸謝天華及神經質媽媽鄧萃雯，經常與哥哥Jacky仔爭玩具、爭雪糕，狗咬狗骨。但其實8歲的靖琳十分文靜，拍照時投入擺甫士，接受訪問時則眼仔睩睩聽提問，十分可愛。
親生母呷亁醋
靖琳表示等埋位期間，除了跟着「前輩」Jacky仔在錄影廠內四圍走探險之外，也十分喜歡與爸爸謝天華玩，她說：「謝天華哥哥最錫我，成日陪我玩㗎，鄧萃雯姐姐就成日教我做戲。有一次我覺得自己拍得唔好喊咗出嚟，商天娥姐姐就請我食糖𠱁番我囉。」
劇中鄧萃雯十分緊張Jacky仔與靖琳一對子女，鏡頭背後的靖琳原來也十分愛錫雯女，甚至令媽咪劉太呷醋，靖琳說：「有一次我見到鄧萃雯姐姐好似好攰咁，所以我咪埋去幫佢揼骨囉！」劉太即插嘴說：「我咁多年都冇試過呀。」靖琳聞言即尷尬偷笑
阿檬之女劉靖琳
年齡：8歲
入行經過：跟姨丈到拍攝廣告現場時被邀請加入拍攝
部份演出作品：
電影：《忘不了》、《絕世好賓》、《戀情告急》、《殺破狼》
電視：《法證先鋒》、《東方之珠》
廣告：康泰旅行社、嘉頓麵包、海馬傢俬
資料來源：《蘋果》資料室
