啱啱至消化咗足智彩為美洲金盃賽同美職聯開盤，轉過頭又話開埋U21歐洲國家盃，令呢個夏日賭波秩序更頻密，賭波就好似去24小時麥記咁，冇時停，簡直係「Comedowntobettonight,hey~~」。當然，講笑就咁講啫，勸波迷咪咩賽事都去盡，變病態賭徒就唔好囉。
U21歐國盃多球星
U21歐洲國家盃、北歐波、日本波、南美自由盃、美職聯、巴甲、美洲金盃賽，仲有月尾開波嘅美洲國家盃，呢個夏天真係咩時間都有波賭；我求大俠識一個喺馬會做電話投注嘅老友，佢話以前啲南美波通常好早截止投注，但過去一年已經好似今朝場巴甲咁，到開波前一分鐘都仲可以落注。總之，波迷24小時賭波，佢哋亦開足工。
講番禮拜日開波嘅U21歐洲國家盃，戲碼唔曳，大把波迷熟識嘅歐洲4大聯賽球員壓陣，好似英格蘭U21就有韋斯咸嘅李奧曲卡、意大利U21就有帕爾馬嘅基奧斯比羅斯、東道主荷蘭U21亦有阿積士前鋒賴恩巴布，而「現在」將全程直播，球迷過足波癮，投注額肯定唔會少。
出手應量力而為
《蘋果波經》為人民服務，大小通吃，幾多波都咁落力做，但波迷真金白銀出手，就要量力而為；始終呢啲比賽有部份資訊有限，千祈咪當歐洲4大聯賽咁賭，大吉利是講句，變成嗰個勸人咪沉迷賭博嘅廣告咁，睇住班病態賭徒倒錢落海就唔好啦。