香港賭波合法化都係近幾年嘅事，而以世界七大奇景吳哥窟聞名嘅柬埔寨，原來都可以合法賭波；喺濠江有賭廳嘅黃金集團亦進軍當地賭波生意，仲請傳媒實地睇吓佢哋點樣經營。
華華上個禮拜去咗柬埔寨首都金邊一間投注站，發現裏面貼滿足球明星大頭相，又有大電視直播足球，同馬會搞足智彩似到十足十，不過當地彩票size同收貨單咁上下大，最低投注額係1美金。華華小注買咗一張飛留作紀念，居然有「斬獲」，中獎金額8.5美金，華華會全數捐畀蘋果慈善基金。
第二日前往吳哥窟嘅投注站，攞張飛去收錢，諗住好快搞掂，點知當地職員非常審慎，先打電話問番金邊分行了解張飛真偽。當地負責人解釋，唔理金額多少，由於唔係喺同一市內地點買飛同收錢，保守啲doublecheck，以免有人用假飛渾水摸魚，難怪老闆朱沃裕咁放心喺當地搞賭波生意。