心水清嘅讀者應該記得，華華早喺4月中曾經提過國新集團，話呢隻雖然係細價股，但不能睇少，因為當時佢哋換咗個主席，由一個叫胡翼時嘅接任，當時市場流傳呢位胡先生，同國家領導人有親屬關係，呢個關係引嚟股壇唔少炒家嘅興趣，隻股因而炒作一番，國新早喺公佈胡翼時做主席後，股價由當時的0.224元升到近日最高0.44元，升幅高達96.43%。不過，呢個人事變動仲有下文，國新噚日又出通告，委任一位年屆63歲嘅胡錦星做非執行董事。
通告講明，胡錦星係胡翼時主席嘅父親──胡錦星唔係咁多人識，但華華聽講佢係胡錦華嘅兄弟。呢位胡錦華有唔少人識佢，佢係內地大國手，做過包括上海市健康教育所所長，世界衞生組織上海健康合作中心主任等，連國家動漫遊戲產業振興基地管委會主任都做過，早幾年本港上市嘅上海銘源搵咗佢做董事㖭。
不過，呢位華哥最引人注目嘅地方，係佢係國家主席胡錦濤嘅堂兄弟，呢樣嘢通晒天。咁即係話，胡錦星同胡錦濤都係堂兄弟關係，胡錦星以前喺上海復興高級中學及上海外國語大學做咗十多年校長，兩兄弟一個從醫一個執教鞭，不過胡錦星就低調好多，只係家吓退休，反而跟個仔從商。
至於呢個消息出咗，國新股價反而下跌4%，收0.36元。口痕友話，唔通同胡錦星嗰名有關，因為呢個名嘅諧音係「唔敢升」。
[email protected]
