永安旅遊用4.13億，間接攞咗兩條內地豪華列車服務50年經營權，由北京出發，分別前往西藏拉薩同雲南麗江，之不過，收費好揦脷，每人每晚要過千美金，以每程最多5日4夜計，埋單至少3萬9，貴過永安歐美豪華郵輪旅行團，簡直係超超超級豪華團。睇番永安啲旅行團，雲南（包麗江古城）6日豪華直航團，都係4200蚊，平均一日唔使七舊水。
華華有朋友之前搭過青藏鐵路普通版，由北京坐到拉薩，硬座389人仔，軟卧唔使1262蚊，只係唔多舒服啫。
永安旅遊主席余錦基同好拍檔、唐古拉國際CEO白浩江話，兩條路線暫定08年試行，服務拍得住東方快車，每年大概做320日生意，皆因內地同胞越嚟越有米，日本仔又鍾意去中國，唔驚冇客，純利率大概係一般五星級酒店兩三成水平。