金管局任總任志剛同立法會議員卿姐劉慧卿不時擦出火花，任總一年三造出席立法會財經事務委員會時，就係兩人火花爆發之時，係傳媒絕對唔可以走漏眼嘅Encore位，而隨住呢對雌雄寃家年事漸長，兩人嘅交鋒亦由以前惡形惡相、刀光劍影，臻至近年言笑晏晏、綿裏藏針嘅高超境界。
阿爺經濟同埋股市過熱，係人都知，香港咁開放嘅金融體系，梗係驚上面有乜風吹草動，承受唔到，卿姐噚日就問任總，佢話金融環境易受市場情緒影響，咁內地經濟大幅調整，香港承唔承受到？
轉速超班嘅任總眼都唔眨，話唔敢講可以承受到──跟手即刻嚟個回馬槍，話唔單止市場情緒難估，「劉議員你嘅情緒，我都好難掌握，有時都好難承受」，原本悶到暈嘅議事堂，同喺記者席嘅老記即時爆笑，被窒嘅卿姐都好有風度，只係帶笑發嬌嗔。