無綫劇集《師奶兵團》上星期平均收視34點（約220萬觀眾），噚日無綫喺將軍澳舉行慶功同擺和頭酒，劇中三位老公謝天華、郭政鴻同艾威即場向鄧萃雯、商天娥同葉童謝罪，三個男人要喺石春路上滾來滾去、跪榴槤、頂痰罐同用芥辣刷牙，艾威仲辣到嘴唇紅晒，認真搞笑。
角色唔討好
難得嚟宣傳嘅葉童噚日一出現就大吐苦水，佢話做呢個角色唔係咁討好，拍之前都有掙扎過，但接之前未有劇本，佢都唔知係乜角色。原來戲份問題都令葉童不滿，佢話：「之前傾話三個嘅戲份差唔多，原來最重戲係鄧萃雯。」問葉童會唔會覺得俾人呃咗，佢話：「我本身好想同佢兩個合作，係心甘情願，但同原先想法唔同，只係我個角色被誤導咗。」
雯女對於葉童嫌戲份少一事就話：「戲少同俾人呃我都遇過，所以下次叻啲囉，大家唔好成日以為佢少講嘢，同少宣傳就話佢先得㗎。」
自爆分房瞓
另外，商天娥前晚喺電視廣播城錄影節目，講到環保意識，佢話：「我去廁所開大用唔夠10格廁紙，開細用4格，多數用3格，我平時會用手巾仔。」商天娥笑指男友用廁紙多佢一倍，佢又話：「佢話patpat大過我。平時我哋都好少開冷氣，一人一把風扇，因為我哋分房瞓。」咁點行房？商天娥坦白咁話：「都唔行嘅。」
