雖然薄餅唔係英國傳統美食，但喺呢個crossover年頭，車路士中場林柏特就好緊貼潮流，聯同意大利冠軍騎師戴圖理（FrankieDettori），以及「英國廚藝之父」韋德（MarcoPierreWhite）拍膊頭合作開薄餅店，合組英國版「美男廚房」，冀望喺商界殺出條血路！
林伯隨時變「肥仔」
出名鍾情薄餅、意大利粉嘅林伯，最近俾自己球迷勁開汽水，話佢場上無表現，但佢一於少理，希望喺未掛靴前為自己鋪路，所以諗住開番間薄餅店𢱑真銀；而其中一間分店就睇中車仔主場史丹福橋，你都咪話「唔熟唔食」！
本來塊面已經有啲「肉地」嘅林伯，6呎高，體重已超過170磅，喺足球員中唔算重，但睇佢屬肥仔底，所以俾人感覺輕微偏重；我求大俠唔係話憎人富貴，但係想叮囑林伯，到時有薄餅免費任食，真係要小心越食越肥。事關佢28歲仲係當打之年，一吓唔覺意，「因餅失身材」，就恨錯難返！
開正戴圖理嗰瓣
至於騎師戴圖理剛贏得英國葉森打吡，呢個係賽馬界一個好高榮譽嘅賽事，佢玩咗15年先贏到1次，理論上佢都賺到笑。但所謂錢就冇人嫌多，加上佢係意大利人，一向識食；而且早已經同喺英國飲食界「響晒朵」嘅韋德合作開食肆，今次佢哋睇準時機出手，同林伯玩crossover，呢間「美男廚房」想唔發都難！