揸得車嘅梗想愛驅受人注目，你見周街HelloKitty、藤原豆腐店、熊出沒注意嘅拉花就知喇！唔甘於人有我有，設計完俾車房噴油貴到飛起，慢吓手仲要等幾個禮拜！想快靚正，不如試吓BannerShop嘅噴畫拉花，莫講話將加菲貓、高達黐上車，就算成個吳尊擺喺車頭冚日對夜對，都只係千零蚊，仲快到一粒鐘搞掂！
記者：梁美甜
攝影：陳偉強
模特兒：Victoria
鳴謝：BannerSHOP、Spec-R
全車拉花 9個鐘快取
不論你是動畫迷、影迷抑或是甚麼偶像迷都好，𠵱家只要你想將你「心上人」做拉花裱係車上話咁易，由Hit到爆嘅吳尊到Out到暈嘅四大天王都好，又或者你只愛幾何圖形，甚或自行創作都好，只要將相片或檔案交到BannerShop手上，就可用一分鐘時間將佢製成噴畫拉花，由8R相變成5呎×4呎咁大，跟手有師傅幫你裱埋。嫌車頭冚太細唔夠喉？拉晒全車都係8至9個鐘度，花費約$8,000，攞去車房全車噴油都唔止呢個價，噴畫拉花仲防水防UV兼可隨時搣走，方便到一年換4次款都仲得！
有冇侵犯肖像權？
大家一定會問，將偶像個樣裱係車身是否違法？小記先問過海關新聞主任羅小姐，佢回應話現時香港並未有肖像權，而海關所執行的《版權條例》、《商品說明條例》、《防止盜用版權條例》都並未包括以肖像印在車身私用是違法行為。至於運輸署公共關係科莊先生就指出，法例無列明在車身拉花噴畫是否違法，不過若有人覺得你架車影響他人駕駛的話，運輸署就會根據《道路交通安全條例》要你去驗車，之後才決定是否違規。即係話仲未有法例明確指出在私家車上拉花噴畫自用是否違法。
製作簡單防水防曬易打理
要為愛車做拉花非常簡單，只要預先準備一張8R相片或JPG檔案（約5MB）畀師傅Benny，佢就會先喺電腦Mock-up個效果畀你睇，滿意的話就會視乎位置以3MRemovable貼紙或網孔貼，再印成合適尺寸嘅貼拉花。呢張拉花防水防UV，平時用水抹就可以，打理容易，一般都可以用兩年左右。師傅拿到拉花圖案之後就會以濕毛巾抹亁淨要拉花的位置以防有塵埃，之後會以Cutter及膠挖沿車身切割拉貼，遇有凹凸位置時就要小心切割，如SmartCar就是難度當中表表者，最後就以火槍、風筒又或者火機等等以熱力令邊位收縮貼好就完成。師傅話若然自己貼的話千祈咪用水來推，皆因會令拉花彈番出來的，其實全車拉花印刷連手工都只不過八千蚊，蹺埋手唔使煩等收貨至啱我，幾個鐘就行得！
比傳統噴畫快30倍
大型噴畫公司老闆Benny明言，任何花款都可以做成拉花，皆因佢有部全港只得兩部而價值500萬的噴畫機，這部機比傳統的噴畫機快30倍有多，要Print一張兩層樓高的海報都只係一分鐘！
實試
加菲貓：圓圓渾渾20分鐘搞掂
我至愛加菲，不知幾想日對夜對佢個招積樣，Benny就搵嚟有十幾年拉花經驗嘅陳師傅為我示範；由於要貼在玻璃窗上，加菲上半身會用可內外看穿嘅網孔貼。由於車門平面多易處理，用咗20分鐘就完成！提提大家，司機位拉花絕對違規兼睇唔到盲點，要做都只係後門玻璃窗好喇。
正義高達：多角位要35分鐘
編輯大哥至愛Gundam，為咗滿足佢，就拉花送畀佢睇吓啦！由於Gundam多細緻位，Printout之後仲要Cut番個輪廓出嚟，仲要就尾燈、後門水撥位切割，所以需時較長，約莫35分鐘，都好快喇。
要型要怪 悉隨尊便
拉花款式絕對可多樣化，幾何圖形、騎呢公仔乜都得，就算要BannerShop幫你設計埋都可以，幾複雜都有得傾；就以甩尾王阿Wing架跑車為例，全車鑽石拉花再配幾道綠色火焰，想像到喺跑道上馳騁時一定型到爆！
非洲猛獸周街跑
收費
一般3MRemovable：每呎$12
玻璃窗用網孔3MRemovable：每呎$20
車頭冚拉花（印製連手工）：$1,000起
全車拉花（印製連手工）：$8,000起
＊所需時間：由車頭冚1小時至全車9至10小時，按複雜程度而定。
查詢：BannerSHOP（29888080）