歐洲足球已進入歇暑狀態，剩番西班牙甲組聯賽還有兩周比賽，皇馬、巴塞、西維爾三隊仍然未知鹿死誰手。牌面上皇馬佔優，即使三隊一齊連贏兩場，皇馬會攞冠軍。假若如此，碧咸離開皇馬，不致空手而回，皇馬領隊卡比路亦會坐住個位，坐得好穩陣，呢位意大利人重視贏波，唔理贏得是否好睇，與車仔嘅摩連奴互相輝映。
冇足球睇，轉睇NBA，西岸聖安東尼奧馬刺隊已擊敗猶他爵士隊（四比一），睇吓明日冠軍決賽會對邊隊，寫稿時未知。照睇無論底特律活塞還是克里夫蘭騎士，都唔會打得贏馬刺。對NBA與電視台嚟講，活塞對馬刺係收視率下跌嘅保證，引唔起睇直播嘅興趣。兩隊都係硬橋硬馬，慢鬥慢，防守出色嘅球隊，打波會贏但唔好睇，有啲似車路士。如果講好睇，西岸嘅鳳凰城太陽對金州勇士嘅話，大家快鬥快，似足癲鳳對狂龍，會好好睇，但呢兩隊嘅防守唔得，想攞NBA總冠軍，發吓夢先。
肥仔K曾在加州讀書，係金州勇士擁躉，呢隊波衰足十幾年，今年創下奇蹟，打入季後賽，仲爆大冷掃走大熱門頭號種子達拉斯小牛，整個主場（屋崙市Oakland）球迷為之瘋狂，肥仔K啲加州同學到現場睇波，捧場喝彩聲音高到一百一十分貝，並且全場球迷穿上黃色T恤，心口寫上WeBelieve，輸完兩場後就寫WeStillBelieve，肥仔K睇電視見到，恨到口水流，打電話去搵現場觀戰嘅同學，要求代買一件，但現場太嘈，根本講唔到嘢。勇士在第二輪第三場對爵士，上半場射入七十分，射球之準繩，入球之快，令人吃驚兼拍爛手掌。
球壇前輩遜哥某一次到浸會大學聽中國籃球教練演講，教練話中國球員平均高度遜於歐美球員，所以球隊追求速度與準繩。遜哥聽完大嘆中國籃球冇前途，亞洲人矮啲就會速度快過人？發夢啦，睇吓巴朗戴維斯、東尼柏架、韋特（DwyaneWade）、高比拜恩、路域斯基啲速度，中國有邊個球員夠佢哋快呀，射波點夠人準呀？中國唔係冇長人，只不過體能與速度過不了關啫。