王氏港建舊年8月以每股1.38元提出私有化，但法院會議唔批，今年4月抄電盈曲線私有化SUNDAY條橋，以賣斷資產後除牌，向股東每股派1.65元，諗住輕易過關，點知撞正「股壇長毛」、港交所董事DavidWebb搞革命，吹雞叫小股東喺6月28日投票否決。
王氏港建噚晚發出嘅通告話，聲稱揸住3.16%股權嘅DavidWebb喺5月中，已經多次向公司表示不滿，仲要當面約見主席王忠桐，要求提高派送，王主席聯同公司財務顧問渣打銀行喺6月1日設鴻門會，但最後傾唔掂數。由於議案要通過，大股東係冇權投票嘅，只有餘下20.57%股份可以話事，如果當中超過一半否決，美夢即時拜拜。Webb哥就話，除非大幅提價，否則單憑個人力量，都夠飛玩串個party。
死都唔提價
王氏港建即刻查吓股東名冊，但就證實唔到Webb哥係咪真係夠飛，既然係咁，不如玩一鋪showhand，公司死都唔提價，仲話1.65元係最終價格，力撐呢次條款已經好合理。通告仲向小股東作出呼籲話：「閣下之投票非常重要！如不交回代表委任表格，將冒上股東特別大會議決結果，違反閣下意願之風險。」
華華記得，王忠桐位公子王賢誌，早前先話退出娛圈，幫家族經營業務，如果今鋪再遇滑鐵盧，唔知會唔會改變初衷呢？