嗰日班朋友約食飯，有人提議去打邊爐，真係未食已經抹一額汗，但個老友話帶我哋去間食咗唔會燥，男食咗可以壯陽，女食咗可以靚爆鏡嘅新開火鍋店打邊爐。
間舖喺大角嘴，叫「肥牛工房」，啲火鍋湯底都好鬼抵死，男士火鍋湯底叫「壯志驕陽」；女士嘅火鍋湯底叫「嬌生慣養」。咁男女一齊食嘅又叫乜？咪叫「男親女愛」囉。改乜嘢名都得啦，最重要係有姿勢又有實際！
中藥湯底唔會爆瘡
張老闆正襟危坐咁講，啲湯底係中醫師編寫，每款都有10幾種中藥，「壯志驕陽」火鍋湯底加入咗雞子、牛荔枝同牛骨髓等，可以保腰壯陽；「嬌生慣養」就配花膠、鮮人參等，食咗可以清熱養顏。啲中藥湯底平衡咗因火鍋所引致嘅燥熱，食完唔會爆瘡。
佢仲提醒我哋要飲埋杯「天之驕子」消脂去濕茶，功效係去膽固醇，一定要飲；新張期間，食火鍋送多幾塊澳洲AA級肥牛㖭﹗聽完老闆講，我即刻幫男友叫個「壯志驕陽」火鍋。有需要嘅姊妹，可致23957666訂位。
逢周一至周四刊出