阿囡睇完電影《魔盜王》之後，成日扮阿Jack，又猛咁講：「WelcometoSingapore！」搞到阿媽阿爸冇晒符。既然阿女咁恨做魔盜王，不如帶佢去廸士尼，食吓真正的海盜王「大」餐，等阿女可以做一日海盜，一家人去食、玩、搶，體驗一下海盜嘅生活。
記者：梁學文 攝影：何家亮
Model：呂氏一家
開大餐
做海盜，最緊要識得食、玩、搶、瞓，過住快活過神仙嘅生活。一個成功嘅海盜唔單止要識得爭地盤搶劫食物，仲要識得霸個好位開大餐。想做海盜？餐餐大杯酒大塊肉就係首要任務。所以一般海盜餐都會大大份，每道菜嘅份量一定要夠大，正所謂唔大唔食。去到河景餐廳，雖然河景就唔多見得到，不過園林景色就不錯，餐廳四周被園林綠葉包圍，喺呢度開餐好有原野感覺，食飯嗰陣都可以放啲啦！
獨腳海盜燴豬蹄$120
獨腳豬蹄其實是豬手，隻隻都成2斤重，夠大隻。怕肥膩？唔使驚，因為豬手煮嘅時候先用油炸一炸，然後再用蠔油燜。豬手入口外面脆卜卜，咬落又唔會有肥油猛標，食多兩件都唔肥膩。除了豬手之外，亦有毛豆同黑豆等，雜豆燜得夠腍又入味。
鐵劍烤肉$80
鐵劍烤肉主要有雞同豬，先燒後焗，令烤肉有燒烤嘅味道之餘又唔會太過熱氣。烤肉有4款肉選擇：豬扒、排骨、豬肉腸同雞扒，中間夾青椒洋葱，中和咗肉類嘅膩滯感覺。
椰子冬蔭雞湯$55
一份足夠4至5人食，份量大。雖然冬蔭湯最佳嘅Partner都係功（即係蝦），不過今次搭雞又係一個新配搭。湯入口唔太辣，反而有少少甜，椰子味亦夠重。
開快餐
海盜要識得搶嘢，少不免要跟對手打鬥一番，唏！呵！我打！打到攰攰哋，梗係要食番啲嘢補充體力，中午飯食個快餐都無所謂，最緊要夠時間玩玩玩。想食快餐，大可以去碧林餐廳。
原野菠蘿炒飯$45
原野炒飯其實係海鮮炒飯，有蝦、青口及帶子。飯粒唔太硬夠爽口。夏天食菠蘿，夠開胃！
竹串燒雞飯$45
竹串燒雞飯用燒雞翼做燒雞，咪以為雞翼冇肉冇雞味，呢款串燒雞飯味道唔太鹹，有陣香口嘅燒烤味。
開卷餐
其實做海盜最開心就係可以一大班人跳吓舞，唱吓歌，齊齊大叫大跳最開心。大熱天時，跳到身水又身汗，當然要飲番杯果汁。歐洲嘅海盜多數齊集加勒比海一帶，亦會經過中東嘅國家，所以會有中東菜食。喺中東滋味亭就會有中東串燒卷，兩款中東卷都係特別為海盜而設。
串燒雞肉卷$20
雞肉用中東香料醃製，有種獨特的味道，而且在串燒雞肉卷入面加入沙律，令雞肉卷變得更加健康，入口亦多了一重爽脆嘅口感。
黃咒黑珍珠$15
黃咒係菠蘿汁加橙汁，黑珍珠就係台式珍珠。菠蘿汁加橙汁入口稍甜，都係放一陣等冰溶咁啲至好飲，不過冰冰涼涼夠解渴。
魔盜王玩轉廸士尼樂園收費
收費：成人$295（平日）、$350（假日）、小童$210（平日）、$250（假日）
網址: http://park.hongkongdisneyland.com/
