人物：何超瓊、楊其龍
時間：2000年1月28日
地點：泰國布吉島
-經過-
許晉亨𠵱家經常同李嘉欣出雙入對好恩愛，不過佢前妻何超瓊就好似只要事業唔要愛情，感情上冇乜滋潤，但曾幾何時，超瓊都係一個會為愛情而犧牲嘅人，即使結咗婚、老竇賭王何鴻燊反對，都話之佢！
2000年1月28日，英皇老闆楊受成次女楊黛思喺泰國布吉島舉行婚禮，身為新娘弟弟嘅楊其龍同賭王愛女何超瓊都有出席，婚宴當晚又放孔明燈又放煙花，氣氛好鬼浪漫，再加上酒精作怪，超瓊終於忍唔住同楊其龍手拖手熱情抱擁，戀情亦隨之曝光。超瓊初時唔肯承認戀聞，賭王又公開彈楊其龍「質地」唔好，又話個女即使再婚，楊其龍都絕對冇可能，點知同年8月，超瓊真係同許晉亨離婚，之後一個月仲好高調咁同楊其龍手拖手出席派對，正式公開戀情。
不過一向不羈嘅楊其龍，同超瓊公開戀情冇幾耐，竟然喺公開場合同MaggieQ又攬又錫，兩個人傳出緋聞，結果2001年1月，何超瓊宣佈同楊其龍分咗手兩個月，之後佢全副精神寄情工作，而楊其龍就繼續夜夜笙歌。
本欄逢周一至周六刊出